زه‌نگ
ئەندامی جڤاتی نیشتمانی بزووتنەوەی گۆڕان كە هاوكات سەرۆكی پێشووی ئەنجومەنی پارێزگای سلێمانی بوو لە بارەی بایكۆتی مامۆستاوە دەڵێت، ئەوەی بەدیل بۆ حوكمڕانان دادەنێت، مامۆستاكانن، ئەوەی زاناكان بە كائینی ئیجابیی ناوی دەبەن، مامۆستاكانن، ئەوەی ڕابەره، پێشڕەوە، چرایە، ڕووناكیی ناو كۆمەڵگایە، مامۆستایە.
هەڤاڵ ئەبوبەكر، كە بڕیاربوو پۆستی پارێزگاری سلێمانی وەربگرێت لە هەژماری تایبەتی خۆی لە فەیسبوك لە بابەتێكدا دەنوسێت، كە تۆ ڕۆژێك قوتابی نەبووبی، لە گەورەیی مامۆستا ناگەی، بە مامۆستایانیش دەڵێت، تۆ خۆت سەرچاوەی بڕیاری.
هەڤاڵ ئەبوبەكر ئاماژەی بەوەش كردووە، لەگەڵ هەناسەو تاسەو ترپەو ناڵەو هەوڵ و هەنگاوو هیممەت و هەڵوێست و هیواو قوتابخانەو پۆل و پرۆگرام و قوتابیی و جانتاو جل و كتێب و دەفتەرو قەڵەم و بۆردو ماجیك و تەباشیرو شۆستەو شەقام و بڕیارتداین، ئەی كانیی و چاوگ و كارێزو ئەستێڵ و ڕووبارو زەریای ژیان، ئەی مامۆستا.
ئەوەشی خستوەتەڕوو كە تۆ بڕیاری بایكۆتت دا، خۆت دات، چونكە خۆت سەرچاوەی بڕیاری، بەڵام بوویت بە نوێنەری هەموو كۆمەڵگا، هەموو ئەوانەی كە ئەگەر بە دەست ئاڵاكەتیان بەرزنەكردبێتەوە، بە دەم باگیان بۆ كۆبوونەوەی بەر پەروەردە نەدا بێت، بەڵام بەدڵ، سەركزانە، شكاوانە لەبەردەم ویژانی خۆیاندا، لەگەڵتانن.
دەشڵێت، ئەگەر لە شوێنێك ترس چۆكی بە جەستەی زۆرێك دادابێت، بەڵام هۆشێكی زیندوو، دڵێكی پڕزام، لە هەموو كوچەو كەنارو ماڵ و مزگەوت و كڵێساو پەرستگاو دامودەزگاو قوتابخانەیەكدا، دوكان و بازاڕو پڕۆژەیەكدا، بۆ مانەوەی تۆ لێدەدات، ئەی مامۆستا.
نوسیویەتی، كەس لە تۆی مامۆستا باشتر بیرناكاتەوە، تا بێت و بڕیار بۆ مامۆستا بدات، ئەوە مامۆستابوو فێری بیرو بیركردنەوەو بڕواو باوەڕو ڕوانین و ڕەخنەو بڕیاریكردین، مامۆستابوو دوێنێی گۆڕی بە ئەمڕۆ، تاریكیی گۆڕی بە ڕووناكیی، نەزانیی گۆڕی بە زانیاری، ژێردەستیی گۆڕی بەسەربەستیی، كۆیلایەتیی گۆڕی بە ئازادیی، فەو‌زای گۆڕی بە ئارامیی، پاشاگەردانیی بە ئاسایش، وێرانەیی بە ئاوەدانیی، ترس بەبوێریی، ڕق بە لێبوردەیی، ستەمكاریی بە دادپەروەریی، ئیتر مامۆستاكان كۆیلە بۆ حوكمڕانان بەرهەمناهێنن، بەڵكو هەموومان دەكەنە سەركردە، سەركردەگەلێكی جوامێر، كە خەمی خەڵك و خاكی هەبێت، ئەو بوو وەك گۆران فەرمووی:
"ئەگەر دوێنێ مامۆستاكان
یەك سوڵتانیان پێ ئەگەیان
ئەمڕۆ ئەبێ مامۆستای كورد
دانیشێ بە ڕاوێژی ورد
رێگای پێگەیاندن دانێ
بۆ ملیۆنان نەك سوڵتانێ"
لە كۆتایشدا دەڵێت، ئەوەی بەدیل بۆ حوكمڕانان دادەنێت، مامۆستاكانن، ئەوەی زاناكان بە كائینی ئیجابیی ناوی دەبەن، مامۆستاكانن، ئەوەی ڕابەره، پێشڕەوە، چرایە، ڕووناكیی ناو كۆمەڵگایە، مامۆستایە.
مامۆستا دەرگای قوتابخانەی دانەخستووە، ئەوە حكومەتە كە قوفڵی لە زەین و لە بینین و لە هەست و نەست و لە هەوڵ و لە هەنگاوو لە ماڵ و لە بازاڕو لە پڕۆژەو لە بانك و لە بیرەنەوت و لە باخچەو لە قوتابخانەو لە پەیمانگاو لە زانكۆوو لەهەمووشت داوە، ژیانی وەستاندووەو بەستویەتییەوەو گیرفان و خوان و دەرەتان و ژیانی لێزەوتكردووەو دەشفەرمووێت، بڕۆ، چ ڕۆشتنێك، ڕۆشتنێك بێ پێ، بێ هەنگاو، بێ ڕێ، بێ توولەڕێ، بێ ئامانج.
هەڤاڵ ئەبوبەكر ڕووی دەمی كردووەتە ئەوانەی كە ئێستا حوكمڕانی كوردستان دەكەن و وتویەتی "كە تۆ ڕۆژێك قوتابی نەبووبی لە گەورەیی مامۆستا ناگەی، كە تۆ هەمیشە خۆت بە قوتابی فێربوون نەزانی، نەزانانە دەست بۆ هەموو شت دەبەی.. چاك خراپ و باش بەدو ڕاست چەوت و سەركەوتن ژێردەخەی..بۆیە ئەوەی بڕیاردەدات، تەنها خودی مامۆستایە، ئەوە مامۆستایە دواجار دیاریدەكات كەی و بۆ؟ چۆن؟ لەبەرچی؟ بەكام میكانیزم و پلان، بایكۆت دەكات و بایكۆت دەشكێنێت".
کۆمینتی مالپه‌ر
کۆمێنتی فه‌یسبووک